ارتحت 10 ايام ماطلعت من البيت خصوصاً اني في الدور الثاني غسيل مواعين طبخ خفيف اكل من البيت ومن برا عادي لمن طلعت من المستشفى بعد الترجيع اكلت بطاطس ماك 🤣
احاول مااطول واقفه ولا اطول نايمه الصلاة عادي ماجلست على كرسي واكيد الدعاء في كل الاوقات التي يرجى الاستجابه فيها.
حامل ولله الحمد والمنة بعد انتظار 10 سنين
الله يتمم على خير ويرزقني الطفل السليم المعافى تام الخَلق والخُلق بدون زيادة ولا نقصان 🤲🏻
اللي حابه اقوله ابدو بدري قد ماتقدرون لا تضيعون وقت
انا لي تجربه في 2011 كانت سهله وبسيطه ونتايجها روعة مافي مشاكل ضعف تبويض و منشطات بأقل الجرعات ولا اعرف ايش يعني بطانه والحمدلله نجحت من اول مره
لكن طبعا اللي وصلت لعمر اكبر لا تيأس تحاول وتحاول لين تضبط ربي كريييييم مايضيع تعب أحد وكلنا راح نستوفي رزقنا
دعواتكم لي ولجنيني اشوفه سليم معافى
في اول سونار سويته كان في 4 بويضات 3 في مبيض و 1 في مبيض طبعا خفت انها مره قليل
لكن د. ريم قالت مو مشكله نشتغل عليها يعني مو متوقع يكون أفضل مع ضعف المخزون وفي ناس لو وحده نبدأ
توكلت على الله وبديت جرعة منشطات عالية وعطتني 7 ايام واراجع معها طلعنا وقتها 13 بويضة ما شاء الله في السونار لكن كان في بعضها كبرت بزيادة زودتني يوم منشط وعطتني موعد التفجيريه يعني تنشيطي كله 8 ايام ووقتها قالت د. ريم ترى بنسحب ونجمد البطانه عندك جدا سميكه واصلة 16 ماتنفع للترجيع وروحي شوفي وش مشكلتها بعد مانسحب ممكن وبالغالب لحمية وزادت وبانت مع التنشيط .
يوم السحب ما شاء الله سحبوا 10 بويضات الحمدلله كلموني ثاني يوم انه 8 منها ناضجه
بعدها قالوا لي 5 تلقحت واللي استمرت لليوم الخامس 2 من الدرجة الثانيه واللي اتضح غلطهم فيها وقت الترجيع وانها كانت درجة اولى مو ثانيه حتى لمن جمدوها يعني الدقة في المعلومه صفر
طبعاً ذكرت هالمعلومات لاني اعرف أهميتها بالنسبه للي عندهم مخزون ضعيف + عمر كبير
بديت بعدها استعد للترجيع بمتابعة مشكله البطانة اللي اخذت كثيييير من وقتي واعصابي
اخذت 8 شهور عشان اقدر اسوي الترجيع
سويت اول مره منظار عند د. تقي في مستشفى الروضة مباشرة بعد عملية السحب و التجميد سوا مفروض ازالة لحمية وكحت ورحت بنفس الشهر عشان ارجع وباقي بطانه الرحم سميكة
كانت 9 ثالث يوم الدوره اعطتني د. ريم فيمارا ورجعت اسوي سونار بعد 5 ايام وصلت
15 ولا رضت طبعا د. ريم ترجع على هذه البطانة وتكنسلت يعني المنظار ماسوا شي
رحت بعدها المستشفى الالماني راجعت مع د. زينب ال طلال ورحلة عمل المنظار للمره الثانيه اللي كانت بعد المنظار الأول مباشرة سويت سونار واشعه مائيه بينت وجود لحميه ماادري هل هي تكونت والا اصلا ما انشالت لانها ما كانت صغيرة مره المهم لظروف خاصه سويت المنظار الثاني بعد المنظار الاول بـ ٦ شهور بتخدير نصفي هالمره كنت صاحية يعني العادة تخدير كامل ، المنظار شالت فيها اللحميات كانوا 2 وكحتت البطانه وبينت نتيجة المنظار انه عندي نشاط في خلايا الرحم نصحتني احط لولب هرموني عشان نوقف هالنشاط مع اني ما اعاني من نزيف ولا شئ بس قالت لاني أسعى للحمل فوراً ارجعي لدكتورتك وابدي الموضوع ماتضمن ترجع تتكون لحميات جديده.
وقتها كانت د. ريم في ظروف عائلية صعبه وانا ماابي يتأجل الموضوع اكثر غير انها ما اتوقع ترجع على بطانه طبيعيه فاخترت اكمل مع د. هيفاء ، رحت اول موعد مع الدكتوره هيفاء قالت نرجع على دورة طبيعية تماما بدون اي ادوية لانه عندي سماكة ببطانة الرحم يعني لمن رحت لها كانت ثالث الدورة 6 وشوي حتى مع المنظار الثاني ماانحلت المشكله 100٪ فقالت نجرب نشوف التبويض نتابعه بدون ادويه رحت لها يوم 11 من الدوره كان في بويضة مقاس 18 والبطانه 10 قالت خلاص نرجع عليها صح مو احسن شئ لكن الانتظار أكثر ماراح يكون أفضل وانا تو كنت مسويه منظار مباشرة قبل الترجيع فهذا احسن وقت فمشينا على هذه الخطه ورجعت لي يوم 16 من الدورة الحمدلله.